സ്പ്ലിറ്റ് സീറ്റും ഡ്രം ബ്രേക്കുമായി പള്‍സര്‍ 125 പുതിയ പതിപ്പ്; വില 73,274 രൂപ മുതല്‍

 

ഇന്ത്യയിലെ ഇരുചക്ര വാഹന നിർമാതാക്കളിൽ മുൻനിര താരമായ ബജാജിന്റെ പൾസർ ശ്രേണിയിലെ കുഞ്ഞൻ പതിപ്പ് പൾസർ 125 പുതിയ ഭാവത്തിൽ അവതരിപ്പിച്ചു. സ്പ്ലിറ്റ് സീറ്റിലും ഡ്രം ബ്രേക്ക് സംവിധാനത്തിലുമെത്തിയ ഈ ബൈക്കിന് 73,274 രൂപയാണ് ഡൽഹിയിലെ എക്സ്ഷോറും വില. മുമ്പെത്തിയ ഡിസ്ക് ബ്രേക്ക് പതിപ്പിന് 80,218 രൂപയായിരുന്നു വില.

സീറ്റിലെ മാറ്റത്തിനൊപ്പം ഡിസൈനിലും അൽപ്പം മോടിപിടിപ്പിച്ചാണ് ഈ കുഞ്ഞൻ പൾസർ എത്തിയിട്ടുള്ളത്. സീറ്റിന് യോജിക്കുന്ന ചുവന്ന നിറത്തിൽ നൽകിയിട്ടുള്ള സ്പ്ലിറ്റ് ഗ്രാബ് റെയിൽ, റെഡ്, സിൽവർ നിറങ്ങളിലുള്ള ആക്സെന്റുകൾ എന്നിവയും ഡിസൈൻ ആകർഷകമാക്കുന്നതിനായി നൽകിയിട്ടുണ്ട്. മറ്റ് ഫീച്ചറുകൾ മുൻ മോഡലിലേതിന് സമാനമാണ്.

ഡ്രം ബ്രേക്ക് നൽകിയതിനൊപ്പം സുരക്ഷ കാര്യക്ഷമമാക്കുന്നതിനായി കോംമ്പി ബ്രേക്കിങ്ങ് സംവിധാനവും ഈ ബൈക്കിൽ നൽകിയിട്ടുണ്ട്. ഹാലജൻ ഹെഡ്ലാമ്പ്, ഡി.ആർ.എൽ, മസ്കുലർ ടാങ്ക്, എൻജിൻ കൗൾ തുടങ്ങിയവ ഡിസൈൻ ഫീച്ചറുകൾ ഡിസ്ക് വേരിയന്റിലേത് പുതിയ മോഡലിലും പറിച്ചുനട്ടിട്ടുണ്ട്.

മെക്കാനിക്കലായി മറ്റാങ്ങൾ വരുത്തിയിട്ടില്ല. ബിഎസ്-6 നിലവാരത്തിലുള്ള 124.4 സിസി എയർ കൂൾഡ് എൻജിനാണ് പൾസർ 125-ന് കരുത്തേകുന്നത്. ഇത് 11.8 ബിഎച്ച്പി പവറും 10.8 എൻഎം ടോർക്കുമാണ് ഉത്പാദിപ്പിക്കുന്നത്. അഞ്ച് സ്പീഡ് ഗിയർബോക്സാണ് ഇതിൽ ട്രാൻസ്മിഷൻ ഒരുക്കുന്നത്.